Қазақстанның барлық қалалары мен елді мекендерінде кең ауқымды республикалық «Халық заңгері» акциясы өтіп, оның аясында 150 мыңнан астам азамат жоғары білікті мамандардан тегін заңгерлік көмек алды, деп хабарлайды 365info.kz

Дәстүрге айналған «Халық заңгері» акциясы еліміздің 200-ден астам елді мекенінде өтті. Ол халыққа тегін заңгерлік көмек көрсетуді мақсат етіп, биылғы жылы шараға мыңнан астам сарапшы қатысты.

Іс-шара Қазақстан Республикасы Үкіметінің қолдауымен ұйымдастырылып, мемлекеттік билік органдарымен, заңгер-ғалымдар, нотариустар, адвокаттар және сот орындаушыларымен бірлесіп өтті. Ұйымдастырушылар ретінде Қазақстан Республикасының Сыбайлас жемқорлыққа қарсы іс-қимыл агенттігі, Қазақстан Республикасының Әділет министрлігі, «Параграф» ақпараттық жүйесі, Республикалық адвокаттар алқасы, Республикалық заң консультанттары алқасы және т.б. қатысты.

Жыл сайынғы акция өзінің ауқымымен таң қалдырады. Ол республиканың түкпір-түкпірінде бір уақытта басталады. Биылғы жылы жетекші сарапшылар 150 мыңнан астам келушілерге көмек көрсетті, олар құқықтың әртүрлі салаларында: тұрғын үй, мұрагерлік, отбасылық, жер, банк және т.б. мәселелермен жүгінді. Көптеген адамдар үшін «Халықтық заңгердің» кеңестері құқықтық қақтығыстар мен мәселелерді шешуде құтқарушы болды.

Қазақстандықтардың білікті заң көмегін алу мүмкіндігі әрдайым бола бермейтіндіктен, «Халық заңгері» акциясы көпшілік үшін таптырмас мүмкіндікке айналды. Құқықтың әр саласы бойынша білікті мамандарға сауалдарын қойып, мәселелерін шешуге әртүрлі жастағы адамдар келді.

«Халық заңгері» 2016 жылдан бері өткізіліп келеді және жыл сайын географиясын кеңейтуде. Акция ірі қалалардан бөлек, Қазақстанның барлық облыстарының аудан орталықтары мен ауылдарында өтіп, барлық мұқтаж жандарға тегін заңгерлік көмек көрсетіледі.

«Халық заңгері» сияқты іс-шаралар азаматтардың нақты мәселелерін шешіп қана қоймай, қоғамның дамуына, құқықтық мәдениет пен әділеттілік деңгейін арттыруға ықпал етеді.

Республикалық заң консультанттары алқасының барлық Палаталары «Халық заңгері» акция жұмысына белсене қатысты.