Ағымдағы жылдың 8 қарашасында Республикалық заң консультанттары алқасы Қазақстан Республикасы Экология және табиғи ресурстар министрлігі Экологиялық реттеу және бақылау комитеті Құқықтық қамтамасыз ету басқармасының бас сарапшысы А.К. Ахметовамен бірлесіп «Қазақстан Республикасының Кәсіпкерлік кодексіне сәйкес жоспардан тыс тексерулер және кәсіби бақылау» өзекті тақырыбында вебинар өткізді.
Вебинар барысында спикер Айгүл Кәкенқызы мемлекеттік бақылау мен қадағалаудың мақсаттары мен міндеттері, кәсіпкерлік субъектілері үшін кепілдіктер, мемлекеттік бақылау және қадағалау субъектілерінің (объектілерінің) қызметіне қойылатын талаптар, бақылау нысандары, тексеру түрлері, тәуекел дәрежелері және т.б. туралы егжей-тегжейлі түсіндірді.
Вебинарға қатысушылар спикерге жүзден астам сұрақ қойып, оларға толық және жан-жақты жауаптар ала алды.
Вебинар соңында заң консультанттары өзекті тақырып пен мазмұнды вебинар үшін спикерге және Республикалық заң консультанттары алқасына алғыстарын білдірді.
2024 жылдың басынан бастап Республикалық заң консультанттары алқасы спикерлер ретінде тәжірибелі заңгерлерді, мемлекеттік органдардың мамандарын, судьяларды, нотариустарды және жеке сот орындаушыларын тарта отырып, әртүрлі тақырыптарда 30 тегін вебинар өткізгенін еске салғымыз келеді; қараша айына дейін 2000-нан астам біліктілікті арттыру сертификаттары берілді.
Вебинарлардың тақырыптары тікелей заң консультанттарының сұраулары бойынша қалыптастырылады, осыған байланысты оқыту вебинарлары бойынша ұсыныстар мен ұсынымдарды info@rcla.kz эл.поштасына жіберуді немесе посттың астына қалдыруыңызды сұраймыз.
