Алматы – 2022 жылғы 24 наурызда Қазақстан Республикасының Әділет министрі Қанат Мусин Алматы қаласының салалық палаталарының өкілдерімен кеңес өткізді. Күн тәртібінде Алматы қаласының заң қоғамдастығына қатысты мәселелер, атап айтқанда Алматы қаласындағы адвокаттардың, жеке сот орындаушыларының, заң консультанттарының, нотариустардың және Алматы қаласындағы сот сарапшыларының қызметіне қатысты мәселелер талқыланды.
Сонымен қатар, Алматы қаласының салалық палаталарының өкілдері әр саланың қызметі бойынша өзекті мәселелерді айтып, ұсыныстар мен оларды шешу жолдарын айтты.
Отырыс барысында, Министр салалық палаталар қызметінің айтылған әрбір бағытына назар аударды. Азаматтардың құқықтары мен заңды мүдделерін ескере отырып, ұсынылған бастамалар, сондай-ақ оларды кейіннен іске асыру мәселелері талқыланды.
Қорытындылай келе, Министр кездесуге қатысқандардың барлығына алғысын білдіріп, Алматыда болған ауыр қаңтар оқиғасы кезінде көмек көрсетіп, қоғам игілігіне үлкен тарихи үлес қосқан заңгерлерді, заң консультанттарын және заң қоғамдастығының басқа да өкілдерін ерекше атап өтті.
