14.07.2021 ж. әділет органдарында Қазақстанның республикалық заң консультанттары алқасы (бұдан әрі — Алқа) мемлекеттік тіркеуден өтті.

«Адвокаттық қызмет және заң көмегі туралы» ҚР Заңына сәйкес Республикалық заң консультанттары алқасы — облыстардың, республикалық маңызы бар қалалардың және астананың кемінде үштен екісінің атынан өкілдік ететін заң консультанттары палаталарының ерікті мүшелігіне негізделген, қызметі мен өкілеттіктері Қазақстан Республикасының заңнамасында, алқа жарғысында айқындалатын және өзінің мүшелері болып табылатын заң консультанттары палаталарына қатысты және олардың мүдделерінде жүзеге асырылатын коммерциялық емес ұйым.

Алқа қызметінің мақсаттары Заң консультанттарының қызметін үйлестіру, Қазақстан Республикасында заң консультанттары институтын жетілдіру және дамыту, заң консультанттары көрсететін заң көмегінің сапасын арттыру болып табылады.

Алқа қызметінің мәні мыналар:

1) заң консультанттары палаталарының қызметін үйлестіру;

2) мемлекеттік органдарда, мемлекеттік емес ұйымдарда, оның ішінде шетелдік және халықаралық ұйымдарда заң консультанттары палаталарының мүдделерін білдіру;

3) нормативтік құқықтық актілерді әзірлеуге қатысу және заң көмегі мәселелері бойынша әдістемелік материалдар әзірлеу;

4) Қазақстан Республикасының құқықтық саясатын насихаттауға қатысу;

5) заң консультанттарының ғылыми-практикалық конференцияларын өткізу және оларға қатысу;

6) кешенді әлеуметтік заң көмегі институтын (pro bono) іске асыруға және нығайтуға жәрдемдесу;

7) нормашығармашылық және құқық қолдану практикасын жетілдіруге жәрдемдесу;

8) заң білімін, заң ғылымын, медиацияны және дауды шешудің жаңа балама тәсілдерін дамытуға жәрдемдесу;

9) заң консультанттарының біліктілігін арттыруға, заңгерлік мамандықтың абыройын арттыруға, заң консультанттары қызметінің ұйымдық-құқықтық негіздерін нығайтуға, олардың әлеуметтік-құқықтық қорғалуына, заңгерлерді қазақстандық патриотизм рухында тәрбиелеуге, заң ережелерін, кәсіптік әдеп нормаларын мүлтіксіз сақтауға жәрдемдесу;

10) Қазақстан Республикасында азаматтық қоғам мен құқықтық мемлекет қалыптастыруға қатысу;

11) өңірлік және халықаралық деңгейлерде заңгер мамандығы өкілдерінің арасында кәсіптік және мәдени байланыстар орнату және дамыту;

12) азаматтардың құқықтық мәдениеті мен құқықтық санасын арттыруға жәрдемдесу болып табылады.

01.07.2021 ж. өткен Алқаның Құрылтай съезіне елдің 17 өңірінің, оның ішінде: Нұр-Сұлтан, Алматы, Шымкент қалаларының, сондай-ақ Ақмола, Атырау, Павлодар, Түркістан, Қостанай, Ақтөбе, Жамбыл, Маңғыстау, Қарағанды, Шығыс Қазақстан облыстарының 13 өңірінен өкілдік ететін заң консультанттары палаталарының делегаттары қатысты.

Съезд делегаттары Жарғыны бекітті және Құрылтай шартын жасады, Басқарма құрамы (саны 7 адам) және тексеру комиссиясының төрағасы сайланды, сондай-ақ алқаның жалпы мұқтаждықтарына мүшелік жарналардың мөлшері бекітілді. Жарғыға сәйкес алқа басқармасының мүшелері өз өкілеттіктерін ақысыз негізде орындайды.

Алқа төрағасы болып белгілі мемлекет және қоғам қайраткері, заң ғылымдарының кандидаты, профессор С.Б. Ақылбай сайланды.

Құрылған республикалық алқа өз жұмысын заң консультанттарының өкілеттіктерін кеңейту, мемлекеттік деректер базасына қол жеткізуді қамтамасыз ету, жеке практикамен айналысатын заңгерлердің кәсіби қызметіне кепілдік беру және әлеуметтік қорғау жөніндегі заң жобасын әзірлеуден бастайды.

Таяудағы перспективада алқа мемлекет кепілдік берген заң көмегін көрсететін тұлғалардың тізбесіне заң консультанттарын енгізу үшін барлық қажетті шараларды қабылдауды жоспарлап отыр.

Бұдан басқа, "Адвокаттық қызмет және заң көмегі туралы" ҚР Заңының 24-бабына сәйкес Республикалық заң консультанттары алқасы заң консультанттарының бірыңғай электрондық тізілімі қалыптастырылатын және заң консультанты мәртебесін растау процесін автоматтандыру үшін сот органдарының ақпараттық жүйесімен интеграциялау жүргізілетін заң көмегінің ақпараттық жүйесін сенімгерлік басқаруға алады.

Республикалық заң консультанттары алқасы барлық басқа да Заң консультанттары палаталарын Алқаға қосылуға және қойылған мақсаттарға бірлесіп қол жеткізуге және тұтастай алғанда заң мамандығының беделін арттыруға шақырады.