Конституциялық Сот Республикалық заң консультанттары алқасымен бірлесіп конституциялық іс жүргізудің өзекті мәселелері бойынша вебинар ұйымдастырды.

Конституциялық Соттың Төрағасы Эльвира Әзімова, оның орынбасары Бақыт Нұрмұханов, КС судьялары Айгүл Қыдырбаева және Ерлан Сәрсембаевтың, сондай-ақ КС аппараты қызметкерлерінің қатысуымен өткен интерактивті шараға еліміздің барлық өңірлерінен 100-ден астам заң консультанты қатысты.

Спикерлер заңгерлерді Конституциялық Соттың негізгі функциялары және өкілеттіктерімен, конституциялық іс жүргізудің шарттарымен, қағидаттары және ерекшеліктерімен таныстырды, сондай-ақ осы органға өтініш беру процесінде заң консультанттарының рөлін түсіндірді.

«Сұрақ-жауап» сессиясы барысында қатысушылар Конституциялық Соттың судьяларына өздерін қызықтырған сұрақтар қойып, оларға жан-жақты жауаптар алды.

Төраға Эльвира Әзімова бұл шараны өткізу Конституциялық Соттың қызметі туралы халықтаң хабардарлығын арттыру, өтініштерді ресімдеуге қойылатын талаптарды нақтылау және кәсіби заң қоғамдастығымен өзара іс-қимылды нығайтудағы маңыздылығын атап өтті.

КС-тың Телеграмм-арнасы - ConstitutionalCourt_KZ